Referendumi në Katalonjë, policia bllokon shkollat ku do kryhet votimi

Filed under: Politike |

Më tepër se 160 shkolla në Katalunja janë pushtuar nga aktivistët në përpjekje për t’i mbajturat ato hapur në prag të referendumit që pritet të mbahet të dielën. Nga ana e vet policia spanjolle bllokoi aksesin në 1300 prej 2315 shkollave të Katalunjës, të cilat do të ktheheshin në qendra votimi për referendumin e shumë-kundërshtuar të pavarësisë.

Autoritetet kanë intensifikuar përpjekjet për të ndalur referendumin e të dielës me efektivët që kanë pushtuar qendrat e telekomunikacionit të qeverisë lokale. Dhjetëra mijëra vetë pritet të votojnë në referendumin e 1 tetorit, i shpallur i paligjshëm nga gjykata kushtetuese e Spanjës.

Me mijëra janë edhe policët e dërguar në rajon për të penguar zhvillimin e tij. Ata janë urdhëruar të spastrojnë shkollat e pushtuara nga aktivistë, prindër e fëmijë, që po qëndrojnë në godina që prej të premtes. Efektivë të policisë rajonale katalanase janë udhëzuar të asistojnë, por u është thënë gjithashtu të mos përdorin forcën.Katalunja, një rajon i pasur me 7,5 milionë banorë në Spanjën veri-lindore ka gjuhën dhe kulturën e veçantë si dhe një shkallë të lartë autonomie, por nuk njihet si një komb i ndarë në kushtetutën spanjolle. Në bazë të sondazheve paraprake të kryera në rajon, pritet që shumica e votuesve të mbështesin shkëputjen nga Spanja.